Шаңырақ ісі бойынша сотталған Құрманғазы Өтегенов бостандыққа шықты

Шаңырақ оқиғасынан кейін 20 жылға сотталған Құрманғазы Өтегенов бостандыққа шықты.

«Шаңырақ ісі» бойынша ұзақ мерзімге сотталған Құрманғазы Өтегенов тамыздың 19-ы күні таңертең босатылды» делінген Азаттық радиосының хабарламасында.

2006 жылғы оқиғадан кейін Өтегенов алғаш рет 16 жылға сотталса, 2013 жылы «түрме әкімшілігінің заңды талаптарына бағынбады» деген желеумен тағы екі жарым жылға бас бостандығынан айырылған.

Еске салсақ, 2006 жылы 14 шілдеде Алматы полициясы арнайы жасақпен бірлесіп, үйлерін бұзуға кедергі жасаған Шаңырақ тұрғындарын таратуға әрекеттенген болатын. Қақтығыс салдарынан полиция қызметкерлерінің бірі Әсет Бейсенов тірідей өртеніп кеткен.

Өтегеновтен бөлек, «Шаңырақ ісі» бойынша 2021 жылдың күзінде бостандыққа шыққан белгілі ақын, саяси қайраткер Арон Атабек те істі болған. Бостандыққа шыққан кезде белсендінің денсаулығы қатты бұзылып, ол 24 қарашада 69 жасында қайтыс болды.