Шайбалы хоккейден келесі әлем чемпионаты Қазақстанда емес, Германияда өтеді

Финляндияда өткен Халықаралық шайбалы хоккей федерациясының конгресі отырысында әлем чемпионатын Германия қабылдайтыны белгілі болды.

Қазақстан да өтініш бергенімен Германия 102 дауыс (75%) алды. Қазақстандық өтінім 34 дауыс (25%) жинады.

Айтпақшы, Германия шайбалы хоккейден әлем чемпионатын осымен тоғызыншы рет өткізеді. Бірінші әлем чемпионаты 1930 жылы осы елде өткен. Германия соңғы рет әлем чемпионатын 2017 жылы Франциямен бірге Кельн қаласында өткізді.

2022 жылдың қыркүйегінде Президент Қасым-Жомарт Тоқаев Халықаралық шайбалы хоккей федерациясының президенті Люк Тардифті 2027 жылы шайбалы хоккейден әлем чемпионатын Қазақстанда өткізуге шақырды. Бұл ұсыныстан кейін Қазақстан бірден өтініш берді. Онда екі ірі нысан көрсетілген: Астанадағы 11 400 орындық «Барыс Арена» және Алматыдағы 12 500 орындық «Алматы Арена».