Шахтёрлар көтерілісі: «Казақмыс» корпорациясының жұмысшылары ереуілді тоқтатты

Жамбыл облысындағы «Шатыркөл» кенішіндегі штаттық режимдегі жұмыс қайта қалпына келтірілді, деп хабарлайды Orda.kz.

20 желтоқсан күні сағат 9:00-дегі жағдай бойынша жұмыс беруші мен «Шатыркөл» кенішінің жұмысшылары нәтижелі келіссөздерден кейін, қос тарап еңбек шарттары бойынша ортақ келісімге келді. Айта кетейік, бұған дейін жұмыскерлер Ұлытау облысында болып жатқан жағдайға байланысты әріптестерді қолдау мақсатында өз жұмыстарын тоқтатқан болатын. 

«Қазақмыс» корпорациясының ресми сайтының мәлімдеуінше, қазір кеніштегі жұмыс қалыпты жағдайға түсіп, жұмыскерлер өз жұмысын қайта жалғастырды.

Еске сала кетейік, Ұлытау облысы, Сәтбаев қаласында кеншілер ереуілге шығып, іс әлі де өз жалғасын тауып жатыр. Наразылықтың басты себебі – айлықтың аздығы.