Үш вайнер қаржы пирамидасын құрды деген күдікке ілінді

Желіде вайнер Мейіржан Төребаев, актер Мейірхан Шерниязов және Әзімжан Саидбаевтың қаржы пирамидасын құрғаны туралы ақпарат жарияланды.

«Тергеу мәліметтері бойынша Төребаев, Саидбаев пен Шерниязов mudarabah capital қаржы пирамидасын жарнамалап қана қоймай, сонымен қатар компанияның тең иелері ретінде тұрақты түрде табыс тапқан. Бұған дейін бұл іс бойынша компанияның бас директоры Руслан Бұрханов қамауға алынды. Ең қызығы, Төребаев, Саидбаев пен Шерниязов кепіл беріп, қамаудан шыққан» деп жазды телеграм арналардың бірі.

Алматы қалалық соты ақпаратты растады. Белгіл болғандай, үшеуі де Қылмыстық кодекстің 217-бабы (қаржы пирамидасын құру және оған басшылық ету) бойынша істі болған.

«Тергеу сотының қаулысымен сотқа дейінгі тергеп-тексеру органының Төребаев пен Шерниязовқа қатысты 1000 АЕК (3 063 000 теңге) мөлшерінде кепіл түріндегі бұлтартпау шарасын санкциялау туралы өтінішхаты қанағаттандырылды» деді сот.

Ал Саидбаев 2 айға сырттай қамауға алынды.

Еске салсақ, 2021 жылдың қазанында Mudarabah Capital компаниясының иесі қаржы пирамидасын ұйымдастырды деген күдікпен ұсталды.

Компания 2019 жылдың ақпанынан 2021 жылдың қаңтарына дейін мемлекеттік сатып алуға қатысқан.

Келісім бойынша компания әр салымшыға салым сомасының 20%-ін төлеуге міндеттелген. Сондай-ақ, ASTEX.KZ ЖШС-ға 160 салымшыдан 2 млрд теңгеден астам қаражат Mudarabah Capital ЖШС-нің басқа компаниясы арқылы түскен.