ШҚО-да мектеп директорының вакцина алмаған оқушыларға ұрысқан аудиосы тарады

Желіде Шығыс Қазақстан облысы Үржар ауылындағы Бауыржан Момышұлы атындағы мектептің директоры Зауре Сатыбалдинованың оқушыларға ұрсып жатқан аудиосы таралып жатыр.

Аудионы таратқан авторлардың айтуынша, мектеп директоры оқушыларды COVID-19-ға қарсы вакцина алуға мәжбүрлеген көрінеді.

– Сендер өз өздеріңе кедергі жасап отырсыңдар. Ыңғай ауру балалар біздің мектепте ғана бар, сау бала жоқ. 51 мектептің 49 мектебі бітіріп тастады. Алып болды. Түгел. Сендер неден қорқып отырсыңдар? Мен сендерді өлімге итеретіндей – менің басым екеу емес. Менде сендерге келерде ойланып келдім. Екі университет, бір колледж бітірген адаммын мен, – деді Зауре Сатыбалдинова.

Сонымен қатар, директор оқушылардың бірінен не үшін вакцина алмайтыны туралы сұрады.

– Шық бері қарай. Атың кім сенің? Не болды? Неге бармай жүрсін вакцинаға?, – деп сұрады директор.

Оқушы оған ата-анасының қарсылығына байланыста вакцина алмағанын алға тартты. Баланың жауабына көңілі толмаған директор ұрысып берді.

 – Қазір сөйлесіп, қазір барасыңдар! Бұл не нәрсе? Неден қорқып отырсыңдар сендер? Қол-аяғың, бәрі сау. Басында алғандар өлген жоқ, – деді Сатыбалдинова.

Оқушыларды тізбектеп, вакцина екпесін алуға күштеп, ата-аналарына хабарласуын талап етті.

Оқушылардың бірінің әкесі ауруханада жұмыс істейтінін естіген директор белгісіз біреуге хабарласып, әкесін жұмыстан шығару керек деп қорқытқан.

– Сәлеметсіз бе? Қалыңыз қалай? Сізге хабарласып тұрған Зауре Қасеновна. Сізде жедел жәрдем қызметінде С-. жұмыс істейді. Сол кісінің баласы вакцина алмай отыр. Шара қолданыңыз! – деді директор телефонда.

Директор барлық оқушыларға тарих сабағынан кейін, ата-анасымен сөйлесіп, вакцина алуын талап еткен.