ШҚО-да колледж ақшасын жымқырған шенеуніктер сотталды

Шығыс Қазақстан облысында спорт саласы шенеуніктері пара алғаны және лауазымдық өкілеттіктерін асыра пайдаланғаны үшін қамауға алынған. Бүгін ауданаралық сот үкім шығарды.

Бұл туралы Orda.kz хабарлайды.

Шығыс Қазақстан облысының қылмыстық істер жөніндегі мамандандырылған ауданаралық сотымен ҚР ҚК 336-бабы, 2-бөлігі (айтарлықтай мөлшерде пара алу) бойынша спорт және дене шынықтыру істері комитеті басқармасының бұрынғы басшысы, ҚР ҚК 361 - бабы, 4-бөлігі (ауыр зардаптарға әкеп соққан лауазымдық өкілеттіктерін теріс пайдалану) бойынша спорт және дене шынықтыру істері комитеті төрағасының бұрынғы орынбасары, ҚР ҚК 190 - бабы, 4-тармағы (Алаяқтық) бойынша ЖШС-ің бұрынғы басшысы сотталды.

«Сот шешімі бойынша Комитет төрағасының экс-орынбасары және ЖШС экс-басшысы алдын ала сөз байласып, жалпы сомасы 354 миллион теңгеден астам бюджет қаражатын ұрлағанын анықтады. Олар мұны «Риддер қаласындағы олимпиада резервінің республикалық мамандандырылған мектеп-интернат-колледжі» 300 орындық оқу корпусының құрылысы бойынша орындалған жұмыстардың жалған актілеріне қол қою арқылы жасаған» делінген ШҚО сотының баспасөз хабарламасында.

Нәтижесінде Шығыс Қазақстан облысының қылмыстық істер жөніндегі мамандандырылған ауданаралық сотымен спорт және дене шынықтыру істері комитеті басқармасының экс-басшысына бес жыл бас бостандығынан айыру, спорт және дене шынықтыру істері комитеті төрағасының экс-орынбасарына үш жыл бас бостандығынан айыру, ЖШС басшысына жеті жыл бас бостандығынан айыру жазасы тағайындалды.

Ауыр сыбайлас жемқорлық қылмыс жасағаны үшін сотталғандар шартты түрде мерзімінен бұрын босатылмайды, сондай-ақ мемлекеттік қызметте қызмет атқару құқығынан айрылады.

Сот шешімі әлі күшіне енген жоқ.