ҰҚШҰ кеңейіп, ұйымға ондаған ел қосылады – Хренин

Ұжымдық қауіпсіздік туралы шарт ұйымы (ҰҚШҰ) кеңейтілетін болады. Бұл туралы Беларусь қорғаныс министрі Виктор Хренин мәлімдеді.

– Менің ойымша, ұйым кеңейеді. Біз жақын арада әлем құрылымының қалай өзгеретінін көреміз, ҰҚШҰ өзінің жауынгерлік дайындығын, өзінің бейбітсүйгіштігін көрсетті. Бірнеше жылдан кейін ұйымда мемлекеттердің агрессивтілігі мен саяси жүйесінің өзгеруін емес, бейбітшілік пен тұрақтылықты бағалайтын ондаған мемлекет болады, - деді генерал-лейтенант.

Министрдің пікірінше, ҰҚШҰ революциялар, терроризм, есірткі трафигі, адам саудасы және биологиялық қатерлер сияқты сын-тегеуріндерге қарсы тұрады.

Қазіргі уақытта ҰҚШҰ құрамына алты мемлекет кіреді: Армения, Беларусь, Қазақстан, Қырғызстан, Ресей және Тәжікстан.

16 мамырда Ұжымдық қауіпсіздік туралы шартқа қол қойылғанына 30 жыл және ҰҚШҰ құрылғанына 20 жыл толады. Осыған байланысты дүйсенбіде Кремльде ұйымның мерейтойлық саммиті өтеді.