Сеулдегі нөпірден қазақстандық студент қаза тапты

Ақтөбе облысынан келген 26 жастағы студент Сеулдегі нөпір  кезінде қаза тапты. Қыз Кореядағы университеттердің бірінде оқыған.

Қазақстандық студент, 1996 жылы туған, Ақтөбе облысының тумасы. Ол Корея Республикасындағы университеттердің бірінің студенті болған.

Дипломаттар марқұмның туыстарымен байланыста екенін, құжаттарды рәсімдеу және мәйітті Қазақстанға жөнелтуге барлық қажетті көмек көрсетіліп жатқанын атап өтті.

Сеул билігі із-түзсіз жоғалғандар туралы 300-ден астам өтініш түскенін хабарлады. Хэллоуин мерекесі қарсаңында қала көшелерінің біріндегі нөпір кезінде 150-ден астам адам қаза тауып, 80-нен астамы жарақат алды. Қаза тапқандар арасында кем дегенде 19 шетелдік бар. Қазақстан Республикасының Сыртқы істер министрлігі қазақстандықтардың тағдырын әлі де анықтап жатыр. Қазақстанның Сеулдегі консулдығында 648 азаматымыз тіркелгені белгілі.

«Консулдық есепте 648 қазақстандық бар, қоңыраулар әлі жалғасуда, сондықтан әзірге нақты мәлімет жоқ. Біз ол жерде болуы мүмкін туристер туралы білмеуіміз мүмкін. Кейбірі келіп-кетіп, консулдық тіркеуге тұрмайды» деді ҚР СІМ.

Сонымен қатар, бұл күндері корей қаласында қанша турист болғаны және қайғылы оқиға орнында болуы мүмкін екені белгісіз. 24.kz арнасының хабарлауынша, осы күндері Сеулде «Қазақстанның жері мен аспаны» атты суретшілер көрмесі өтіп жатыр. Қазақстандық 24 суретші елдер арасындағы дипломатиялық қарым-қатынастың 30 жылдығына арналған экспозициялар қойды. Қазақстандықтардың басым бөлігі Кореяға келе алмағаны, салтанатты рәсім онлайн режимде өткені көрсетілген. Соған қарамастан, Қазақстанның өнер әлемінің біраз өкілдері болды, бірақ олардың Хэллоуин мерекесіне қатысты болған-болмағаны әзірге белгісіз.