Сеулде Мұқағали Мақатаевтың 90 жылдығына арналған кеш өтті

Қазақ поэзиясының бір туар тұлғаларының бірі, ақиық ақын Мұқағали Мақатаевтың 90 жылдығы шетелде ерекше аталып өтті. Кештің ұйымдастырылуына  Қазақстанның  9 елдегі елшіліктері мен консулдықтар ұйытқы болған.

Онлайн кеште шетелдіктер Мұқағали ақынның  өлеңдерін қазақ және ағылшын тілдерінде оқыды. Әдеби кеш Мұқағали Мақатаев туралы «Kazakh TV» телеарнасы түсірген фильммен басталды. Мұқағали Мақатаев өлеңдері  Отан, махаббат пен өмір туралы. Сондықтан оның шығармалары шетелдегі қазақстандықтарға жақын.

Поэзия кешіне қатысушылардың арасында Кореяда 10 жылдан бері тұратын қазақстандық Назгүл Қарабаева мен Мұқағали Мақатаев жырларын сүйіп оқитын сингапурде тұратын Әлихан Батырбеков те бар.

Мұқағали оқырмандары арасында шетелдіктер де көптеп табылады. Мәселен Австралиялық студент Бенджамин Андерсонға Мұқағалидің Нығмет Ибадилдин мен Динара Писарева аударған «Бақыт деген не?» өлеңі ұнаған.

Куала-Лумпур тұрғыны Азва Йонг қазақ елін әлемге танытқан Димаш Құдайбергеннің жанкүйері екен. Оның қазақ тіліне деген сүйіспеншілігі Димаш әндерінен бастау алады. Ол осы кеште Мұқағали өлеңдерін жатқа оқыды.  

— Бар жәндігін сүйемін қыбырлаған, Бәрі маған: «Отан!» деп сыбырлаған Жаным менің, Кеудемді жарып шық та, Бозторғайы бол оның шырылдаған!, деген өлең жолдарын оқыды Азва Йонг.

Онлайн-әдеби кешке Үндістан, Вьетнам, Таиланд және Индонезия тұрғындары да қатысты. Қазақ мәдениеті жанкүйерлерінің келесі кездесуі Наурыз мейрамына жоспарлануда.