Серік Жұманғарин ҚР Ұлттық экономика министрі болып тағайындалды

21 желтоқсанда Мемлекет басшысы Қасым-Жомарт Тоқаев жаңа Ұлттық экономика министрін тағайындау туралы жарлыққа қол қойды, деп хабарлайды Orda.kz Ақордаға сілтеме жасап.

Жұманғарин бұрын атқарған Қазақстан Республикасы Премьер-Министрінің орынбасары – Сауда және интеграция министрі қызметінен босатылды.

Серік Жұманғарин 1969 жылы Ақтөбе қаласында дүниеге келген. Мәскеу энергетика институтын, Е.А.Бөкетов атындағы Халықаралық бизнес академиясы, Қарағанды ​​мемлекеттік университетін бітірген.

1993–2004 жылдары кәсіпкерлік қызметпен айналысқан. 2005-2008 жылдар аралығында Ақтөбе қаласы мен Ақтөбе облысында түрлі басшылық қызметтер атқарған.

2008-2010 жылдары - Қазақстан Республикасы Индустрия және сауда министрлігі Сауда комитеті төрағасының орынбасары, Сауданы дамыту департаментінің директоры,  «Қазақстандық келісім-шарт агенттігі» АҚ басқарма төрағасының орынбасары болды.

2010-2011 жылдары - «NadLoc» жергілікті қамтуды дамыту ұлттық агенттігі» АҚ Басқарма төрағасының орынбасары, бірінші орынбасары.

2012-2013 жылдары - Қазақстан Республикасы Экономикалық даму және сауда министрлігі Өңірлік саясат және бюджетаралық қатынастар департаментінің директоры; Қазақстан Республикасы Экономикалық даму және сауда министрлігі Өңірлік даму комитетінің төрағасы.

2013-2014 жылдары - Қазақстан Республикасы Өңірлік даму вице-министрі. 

2014-2017 жылдары - Қазақстан Республикасы Ұлттық экономика министрлігі Табиғи монополияларды реттеу және бәсекелестікті қорғау комитетінің төрағасы.

2017-2019 жылдары Қазақстан Республикасы Ұлттық экономика вице-министрі қызметін атқарған.

2019–2020 жылдары – Еуразиялық экономикалық комиссияның Бәсекелестік және монополияға қарсы реттеу жөніндегі Алқа мүшесі (Министр). 

2020-2022 жылдары Қазақстан Республикасы Бәсекелестікті қорғау және дамыту агенттігінің төрағасы болды.

2022 жылғы 15 тамызда ол Қазақстан Республикасы Премьер-Министрінің орынбасары – Сауда және интеграция министрі міндетін атқарды. 

2022 жылғы 2 қыркүйекте Қазақстан Республикасы Президентінің Жарлығымен Қазақстан Республикасы Премьер-Министрінің орынбасары – Сауда және интеграция министрі болып тағайындалды.

Мемлекет басшысы өз жарлығымен Премьер-Министрдің орынбасары – Ұлттық экономика министрі Нұрлан Байбазаровты қызметінен босатты.