Сергей Лавров: АЭС – Қазақстан мен Ресейдің маңызды жобаларының бірі болады

Ресейдің сыртқы істер министрі Сергей Лавров Қазақстанда АЭС салу екі елдің маңызды ортақ жобаларының бірі болатынын айтты, деп хабарлайды Orda.kz.

Кездесу барысында ҚР сыртқы істер министрі Мұрат Нұртілеу Қазақстанда АЭС салу жобасы бойынша екі елдің әртүрлі саладағы ведомстволары бірлесіп жұмыс істейді деп үміттенетінін жасырмады.

Ал Сергей Лавров Қазақстан мен Ресей талай бірлескен жобаларды жүзеге асырып жатқанын атап өтті.

«Алдағы уақытта іске қосылатын кәсіпорынның саны қазірдің өзінде 170-тен асты. Олар көлік-логистика, энергетика, металлургия, машина жасау, өнеркәсіп және ауыл шаруашылығы салалары. Қазақстанда атом электр станциясын салу – маңызды жобалардың бірі саналады», – деді министр.

Ресми деректерге сүйенсек, 2024 жылғы 6 қазанда Қазақстан азаматтары жалпыұлттық референдумда АЭС салуға келісім берді.

Қазіргі уақытта Қазақстан ірі қуатты реакторлар технологиясын ұсынатын төрт елдің ұсыныстарын қарастырып жатыр. Олар: Франция, Қытай, Ресей және Оңтүстік Корея.

Энергетика министрлігінің мәліметінше, бір энергоблоктың орташа құны 5 миллиард АҚШ доллары болғалы тұр. 2025 жылғы ақпанда АЭС салынатын орын Алматы облысындағы Жамбыл ауданы деп белгіленді.