Сербияда наразылықтар өрт қою мен қақтығыстарға ұласты

Наразы топ Вучич партиясының штабына басып кірді, полиция көз жасаурататын газ қолданды, деп хабарлайды Orda.kz.

Сербияның Валево қаласында наразылық білдірушілер ел президенті Александр Вучич басқаратын билеуші Сербияның прогрессивті партиясының кеңсесі мен әкімдік ғимаратына от қойып, фаерлар лақтырды. Демонстранттар үкіметке қарсы ұрандар айтып, полицияға тас, бөтелке және сигналдық ракеталар лақтырған.

 Бұған жауап ретінде құқық қорғау органдары көз жасаурататын газ қолданды. Ішкі істер министрлігінің мәліметінше, Валево қаласында көшеге шамамен төрт мың адам шықса, Нови-Садта тағы бес мыңдай адам жиналған.

Ішкі істер министрі Ивица Дачичтің айтуынша, тек он бесінші тамызға қараған түні он сегіз адам ұсталған, кемінде бір полиция қызметкері жарақат алған. Қақтығыстар Белградта, Нови-Садта, Валевода және елдің басқа өңірлерінде тіркелген.

Нови-Сад қаласында наразылық білдірушілер Вучич партиясының штабы орналасқан ғимаратқа басып кіріп, терезелерді сындырып, кейбір жиһаздарды алып кеткен. Белградта демонстранттарға қарсы от шашқыштар қолданылған, көшелерде хаос орнады. Министр кейбір қалалардағы полицияның әрекетін «тым жұмсақ» деп сынап, шараларды күшейтуге уәде бергені жазылған.

Жалғасып жатқан наразылықтар 2024 жылдың қарашасында Нови-Сад вокзалында бетон шатырдың құлап, он алты адамның қаза табуынан басталды.

Наразылар билікті сыбайлас жемқорлыққа, немқұрайлылыққа және жүйелі түрдегі жазасыздыққа айыптауда. Қайғылы оқиғадан кейін құрылыс министрі Горан Весич отставкаға кеткен, кейін бұл нысанды қайта жаңартуға қатысы бар он екі адам қамауға алынған. Қаңтар айында Сербияның премьер-министрі Милош Вучевич те қызметінен кеткен, бірақ наразылықтар тоқтамаған.

Маусым айының соңында Белград көшелеріне ондаған мың адам шығып, президенттің отставкасын және мерзімінен бұрын сайлау өткізуді талап еткен.

Бұл наразылық түнгі қақтығыстармен аяқталып, бірнеше ондаған адам ұсталған, алты полиция қызметкері жарақат алған. Александр Вучичтің сабырға шақырғанына қарамастан, наразылық қозғалысы күшейе түсті.