Сербия президенті Александр Вучич Қазақстанға келді: Екі ел арасындағы тауар айналымы 107 млн АҚШ доллардан асты

Сербия президенті  Александр Вучич Қазақстанға ресми сапармен келді, деп хабарлайды Orda.kz  премьер-министрдің баспасөз қызметіне сілтеп.

Сербия президенті Александр Вучич мемлекет басшысы Қасым-Жомарт Тоқаевтың шақыруымен Қазақстанға ресми сапармен келді. Әуежайда Сербия президентін ҚР премьер-министрі Олжас Бектенов қарсы алды.

«Александр Вучичтің Қазақстан Республикасына ресми сапары аясында саяси диалогты одан әрі нығайту, сауда-экономикалық байланыстарды кеңейту және мәдени-гуманитарлық ынтымақтастықты дамыту мәселелері бойынша жоғары деңгейдегі келіссөздер өткізу жоспарланып отыр» деп жазылған хабарламада. 

Сондай-ақ Сербияның Қазақстанның Балқан түбегіндегі жақын әрі сенімді серіктесі екені атап өтілді.

«Екі ел арасындағы дипломатиялық қатынастардың 30 жылы ішінде өзара құрметке, сенімге және тиімді әріптестікке негізделген достық байланыстар қалыптасты. Өткен жылдың қорытындысы бойынша Қазақстан мен Сербия арасындағы тауар айналымы 7,6%-ға өсіп, 107 млн АҚШ долларынан асты» деп нақтылады үкімет. 

Тоқаев жақында Александр Вучичті Сербияның Мемлекеттілік күнімен құттықтады.  Қасым-Жомарт Тоқаев бұл мереке серб халқының бірлігін және оның ұлттық тұтастыққа, егемендікке әрі тұрақты дамуға деген мызғымас ұстанымын айшықтайтынын атап өтті.

Оқи отырыңыз:

• Сербия президенті мен оның отбасына қастандық жасауға тырысты деген күдікпен екі адам ұсталды
• Сербия Қазақстанға 1 млн еуро беріп, көмектесті