Сенаторлар Назарбаевқа қатысты заңға түзетулерді мақұлдады

Сенат депутаттары мемлекеттік бастамаларды Елбасымен келісу қажеттігінен бас тартуды ұсынды. Бұл норма «Тұңғыш Президент – Елбасы туралы» конституциялық заңда жазылған.

– Сенаторлар Қауіпсіздік Кеңесі мен ҚХА-ны лауазымы бойынша Мемлекет басшысы басқаратын заңнамалық өзгерістерді қолдады. Бұл ретте сенаторлар заң жобасын талқылау барысында тағы бір түзету енгізді. «Тұңғыш Президент туралы» заңда сыртқы және ішкі негізгі салалардағы бастамалар Елбасымен келісіледі деген норма алынып тасталды. Осылайша, Сенат заңнамаға енгізілген түзетулерді тұжырымдамалық түрде мақұлдап, осы түзетумен Мәжіліске қайтару туралы шешім қабылдады, - деді сенатор Ләззат Сүлеймен.

Мәжіліс депутаттары түзетуді қарап, қабылданған жағдайда заң жобасы Президенттің қол қоюына жіберіледі.