Сенат ЖИ туралы заңды мәжіліске қайтарды

Сенат ЖИ (жасанды интеллект) туралы заң жобасын мәжіліске қайтарды. Сенаторлар құжаттағы жекелеген баптарды әлі де жетілдіру қажеттігін айтты, деп хабарлайды Orda.kz.

Сенаторлардың пікірінше, жасанды интеллектіні қолданудан азаматтарға қауіп-қатер төнбеуі тиіс. Сол себепті депутаттар жүйені пайдалану кезінде міндетті қауіпсіздік талаптарын енгізуді ұсынып, заң жобасын Мәжіліске қайтарды.

«Технологияны енгізу берік нормативтік базасыз мүмкін емес. «ЖИ туралы» заң – елімізде алғаш рет жасанды интеллектті реттеудің құқықтық негізін қалыптастыратын маңызды құжат. Біз енгізген түзетулер қауіптің алдын алу мен залалды болдырмауға бағытталған нақты жауапкершілікті күшейтеді», – деді депутат Бибігүл Аққожина.

Енді мәжілісмендер ұсынылған түзетулерді назарға алып, заң жобасына енгізуі қажет.

Айта кетейік, Жасанды зердені дамыту жөніндегі кеңестің бірінші отырысында Қасым-Жомарт Тоқаев жасанды интеллект саласындағы зерттеу университетін ашуды тапсырды.