Сенат Төрағасы Түркия Ұлттық Мәжілісінің төрағасымен кездесті

Сенат төрағасы Мәулен Әшімбаев Түркия Ұлттық Мәжілісінің басшысы Нуман Куртулмушпен кездесті. Кездесу барысында тараптар парламенттік ынтымақтастықты одан әрі нығайту және екі ел арасындағы стратегиялық әріптестікті кеңейту мәселелерін талқылады, деп хабарлайды Orda.kz порталы ҚазАқпарат-қа сілтеме жасап.

Түрік әріптесін қарсы алған Мәулен Әшімбаев Қазақстандағы ауқымды су тасқыны кезінде бауырлас елдің көрсеткен қолдауы мен қолдан келген көмегі үшін алғысын білдірді.

Сенат Төрағасы Түркияның еліміз үшін маңызды стратегиялық серіктес екеніне тоқталды. Екі мемлекет басшылары арасындағы қарым-қатынастың жоғары деңгейі Қазақстан мен Түркия арасындағы ынтымақтастықты нығайтуда шешуші рөл атқарады.

«Елдеріміз арасында берік саяси диалог орнатылып, экономикалық, мәдени-гуманитарлық байланыстар жан-жақты дамып келеді. Біз Түркия Ұлттық Мәжілісімен ынтымақтастықты дамытуға және заң шығару тұрғысында тәжірибе алмасуға мүдделіміз. Нақты және өзара өзекті мәселелерді шешу үшін Қазақстан-Түркия парламентаралық достық топтары әлеуетін пайдалану маңызды деп санаймыз. Сіздің бүгінгі сапарыңыз парламентаралық диалогты дамытуға және елдеріміз арасындағы стратегиялық әріптестікті кеңейтуге айтарлықтай серпін беретіні сөзсіз», - деді Мәулен Әшімбаев.    

Кездесу барысында сұхбаттасушылар Парламентаралық одақ, ЕҚЫҰ ПА және ТүркПА аясындағы өзара іс-қимылдың келешегіне тоқталды.  Сондай-ақ бірқатар бірлескен жобалар бойынша пікір алмасты. Атап айтқанда, сауда-экономикалық және инвестициялық ынтымақтастық, көлік-логистика саласын және басқа да салаларды дамытуға қатысты мәселелер талқыланды.

Мәулен Әшімбаев кездесуге қатысушыларды Қазақстан Президенті бастаған реформаларды заңнамалық қамтамасыз ету бойынша Парламент жүргізіп жатқан жұмыстармен таныстырды. Сонымен қатар, түрік парламентшілері Әлемдік және дәстүрлі діндер лидерлері съезінің 2023-2033 жылдарға арналған Даму тұжырымдамасын жүзеге асыру барысы туралы хабардар болды.

Нуман Куртулмуш өз тарапынан Қазақстанда жүргізіліп жатқан реформалардың маңыздылығын атап өтті. Сондай-ақ, Парламенттің парламентаралық ынтымақтастықты нығайту бағытында атқарып жатқан жұмыстары мен Съезд Хатшылығының рухани дипломатияны дамыту бағытында атқарып жатқан шараларына ризашылығын білдірді.