Сенат Төрағасы Мәулен Әшімбаев коронавирус жұқтырды

Сенат Төрағасы Мәулен Әшімбаев коронавирус жұқтырды. Спикердің айтуынша ол өз бойынан індеттің ешқандай белгілерін байқамады.

Бұл туралы спикер өзінің Facebook парақшасында жазды, деп хабарлайды Orda.kz.

— Құрметті достар! Барынша сақтанып жүргеніме қарамастан, соңғы сынама нәтижесінде коронавирус індетін жұқтырғаным анықталып отыр. Бірақ бойымда аурудың ешқандай белгілері жоқ. Әйтсе де оқшауланып, мамандардың барлық талаптарын қатаң сақтаудамын. Соған байланысты жұмысты да қашықтан жалғастырамын, - деді спикер.

Жазбасында Сенат Төрағасы қазіргі пандемияға байланысты ойымен де бөлісті.

— Өкінішке орай, пандемияның екпіні әлі бәсеңдеген жоқ. Сондықтан арқаны кеңге салып, сақтық шараларына бейжай қарауға болмайды. Бұл, ең алдымен, өзіміз және туған-туыстарымыз үшін аса маңызды. Ендеше індеттің алдын алуға баса мән берейік.

Қазақстанда бір тәулік ішінде 29 адам коронавирустан көз жұмды. 2020 жылдың 13 наурызынан бері барлығы 3599 адам қайтыс болды.