Сенат депутаты Гүлмира Кәрімованың өліміне қатысты қылмыстық іс жабылды

Астана қалалық ІІД бастығының орынбасары Қуаныш Орынбетовке сілтеме жасаған «Патриот» басылымының хабарлауынша, полицейлер жаңадан сайланған депутаттың өлімінен қылмыс белгілерін таппаған.

14 қаңтарда өткен парламенттің жоғарғы палатасына сайлауда Кәрімова Солтүстік Қазақстан облысынан депутат болып сайланды. Ол сонымен қатар Әлеуметтік-мәдени даму және ғылым комитетінің мүшесі болды.

27 қаңтарда 45 жасында Гүлмира Кәрімова дүниеден өтті. Өлімнен кейін бірден парламент өлімнің алдын ала себебі анафилактикалық шок деп ресми мәлімдеме жасады. Бірақ кейін елорданың денсаулық сақтау басқармасынан өлім инфаркттан болғаны туралы жаңа ресми хабарлама келді.

«Гүлмира Кәрәмованың кенеттен қайтыс болуына қатысты сотқа дейінгі тергеу жүргізілді. Бүгінгі күні қылмыстық іс жүргізу кодексі 35-бабының 1-бөлігінің 2-тармағына сәйкес, яғни қылмыстық құқық бұзушылық құрамының болмауына байланысты тергеу тоқтатылды. Осы істі қадағалаған прокурор бұл шешімді мақұлдады», - деді полковник Қуаныш Орынбетов «Патриот» басылымына.

Әңгімелесушінің айтуынша, полицейлер қосымша айғақтарды жинау үшін барлық мүмкіндіктерін сарп еткен. Сондықтан тергеуші іс бойынша қылмыс құрамы жоқ деген қорытындыға келген.

Сәуірдің 21-інен бастап Солтүстік Қазақстан облысынан сенаторлыққа дене шынықтыру және спорт басқармасының басшысы Сергей Мелеховтың кандидатурасы ұсынылды. Сайлау 2 маусымда өтеді.