Сенат депутаты Хасанмен туыстығын растады

Алматы облысынан Сенат депутаты Жанболат Жөргенбаев Талғарда қамауға алынған «Хуторлықтар» басшысы деп аталған Хасан Қасымбаевпен қарым-қатынасы туралы әлеуметтік желіде пайда болған ақпаратқа қатысты пікір білдірді, деп жазады Orda.kz.

Tengrinews.kz хабарлауынша, депутат туыстығын растағанымен, Хасан мен оның ағаларына ешқандай көмек көрсетпегенін айтты.

«Оның облыс тұрғындары сияқты алыс туысым екенін растай аламын. Өздеріңіз білетіндей, қазақтарда туыстық қатынас көп болады. Дегенмен, біз тұрақты байланыста болған жоқпыз. Олардың бізбен қатынасы көбінесе отбасылық жиындар мен жерлеу рәсімдерінде, алыс туыстар жиналғанда ғана ұшырасуы мүмкін еді. Иә, әлеуметтік желілерде Талғардағы Қасымбаевтар ісіне менің ықпалым бар деген мақалалар мен видеоларды көрдім. Мен ешкіммен байланысқа шықпағанымды және Талғар ауданы әкімшілігінің бұрынғы басшысы Аслан Қасымбаевтың қызметте қалуына ешқандай шара қолданбағанымды ресми түрде мәлімдеймін. Сонымен қатар, мен Хасан Қасымбаевқа қатысты тергеуге де ешқандай ықпал етпедім және ықпал жасауға тырысқан жоқпын» деп мәлімдеді сенатор.