Сенат депутаты қаржылық мониторинг тізіміне кімдердің кіретінін айтты

Сенат депутаты Ольга Перепечина қаржылық мониторингте тексерілетін лауазымды тұлғалар туралы сенат отырысынан шыққаннан кейін айтып берді.

Бұл туралы Orda.kz хабарлайды.

Депутаттың айтуынша, қаржылық мониторинг ең алдымен облыс, аудан әкімдерінен басталады.

– Ең алдымен, әкімшілік мемқызметкерлер - облыс, аудан, республикалық маңызы бар қала әкімдері кіруі мүмкін. Ол жерге басшылық шешім қабылдайтын депутаттар, партия басшылары, министрлер, вице-министрлер, ұлттық компания бастықтары да кіруі мүмкін. Сонымен қатар, сот, прокурор және мемлекеттік басшылық шешім қабылдай алатын басқа да басшылар болуы мүмкін. Мониторинг лауазымды тұлғаларға ғана емес, олардың жұбайлары мен жақын туыстарына - балалары, бауырлары, әпкелері, әжелері, аталары, ата-аналары, немерелеріне де жүргізілетін болады, - дейді депутат.

Тізімді Президенттің өзі бекітеді. Тізім 2022 жылы жасалады деп жоспарлануда.

Журналистер тұңғыш президент Нұрсұлтан Назарбаев пен оның отбасы мүшелерінің осы тізімге кіру не кірмеуін нақтылап сұрады.

– Біздің заң жобамызға сәйкес, бұрынғы басшылар, мемлекеттік қайраткерлер өз өкілеттіктерін тоқтатқаннан кейін 12 ай ішінде бақылауда болатын мемлекеттік қызметкерлер тізіміне кіреді, - деп нақтылады Перепечина.

Журналистер нақты жауап алмағаннан кейін «Елбасы, Қауіпсіздік кеңесінің төрағасы ретінде тізімге ене ме?» деп қайталап сұрады.

– Иә. Бүгінгі таңда біздің заңнама аясында мен осылай жауап бере аламын. Депутаттар тізім бойынша ұсыныс бермейді, - дейді сенатор.

Бүгін парламент қылмыстық жолмен алынған кірістерді заңдастыруға (жылыстатуға) және терроризмді қаржыландыруға қарсы іс-қимыл мәселелері бойынша заң жобасын қабылдады. Ол президентке қол қоюға жіберілді.