«Сен кімсің?» Дөрекі полицейдің кесірінен тексеріс басталды

Instagram әлеуметтік желісінде дөрекі полицейдің қатысуымен видео жарияланды. Оқиғаға қатысты Алматы облысы полиция департаменті түсініктеме берді.

Бұл туралы Orda.kz хабарлады.

Анықталғандай, видео Қапшағайда түсірілген. Екі ер адам полиция қызметкерлері көлігінің терезі қараңғыланғанын көріп, оны видеоға түсірген. Полиция қызметкері бірден ашуға бой алдырып, оларға дөрекі жауап беріп, камераны итеріп жіберген.

Жазба авторы:

– Қапшағайдағы заңсыздық, барлығына айыппұл салады, ал өздері көлігін толық қараңғылап алған, - деген.

Оқиғаға қатысты Алматы облысы полиция департаменті түсініктеме берді. Олар видеодағы полция қызметкері екенін растады. Ол – Қапшағай қаласы ПБ патрульдік полиция взводының қызмет инспекторы.

– Алматы облысы Полиция департаменті әлеуметтік желілерге мониторинг жасау барысында анықталған бейнежазба негізінде Қапшағай қаласы ПБ патрульдік полиция взводының қызмет инспекторына қатысты ҚР ӘҚБтК-нің 590-бабы 5-бөлігі бойынша әкімшілік хаттама толтырылғанын хабарлайды, - делінген хабарламада.

Сондай-ақ, полиция қызметкерінің тұрғындармен тиісті дәрежеде қарым-қатынас жасамау дерегі бойынша қызметтік тексеріс тағайындалған.