Семейдегі өрттен зардап шеккендерге көмектескен «Би-2» Қазақстанда өнер көрсетуден бас тартты

Белгілі ресейлік рок-музыкант Лёва « «Дождь» телеарнасына берген сұхбатында топтың Қазақстанда концерт бермейтінін айтты, деп хабарлайды Orda.kz.

«Drama Queens» бағдарламасының жүргізушілері Юлия Таратута, Анна Монгайт және Екатерина Котрикадзе музыканттан, қай елдерде «Би-2» өзінің қауіпсіздігіне алаңдаушылық білдіріп, концерт бере алмайтынын сұрады. Лёва кейбір елдерге топтың әзірге бармауы керек екенін айтты. Олардың қатарына Қазақстан да кіреді.

«Өкінішке қарай, Грузия, Армения, Әзірбайжан, Қазақстан — бұл біздің сүйікті елдеріміз, біз ол жерге үлкен қуанышпен баратын едік. Бірақ қазір, уақыттың өзгеруімен, тыныштық сақтау қажет сияқты», — деді «Би-2» тобының әншісі.

Әнші «Би-2» тобының Әзірбайжанда концерті жоспарланғанын, бірақ кейін оның өтпейтіні белгілі болғанын мәлімдеді.

«Біз Әзірбайжанды өзіміз үшін қауіпті аймақ деп есептемедік, бірақ бүгін біз жаңалықтан Ресейдің тапсырысымен біреуді қамауға алғанын оқыған соң, концерт өткізу қауіпті деп шештік», — деді музыкант.

Әртіс топтың саясатқа араласпайтынын атап өтті. «Би-2» музыканттарының тек бір саяси тақырып бойынша пікір білдіретінін айтты — ол Ресей мен Украина арасындағы соғыс.

«Біз әрқашан саясаттан тыс топ болдық. Мен мұны тура айта аламын. Тіпті қазір біз шетелде тұрсақ та саяси шаралар болғанда бізге шақырулар түссе де, біз бас тартамыз. Тек соғысқа қарсы позициямызды білдіреміз. Қазіргі оқиғалар шығармашылығымызға әсерін тигізуде», — деп сөзін қорытындылады Лёва. 

Өткен жылдың тамыз айында топ Конаев қаласында өтетін Family Rock Fest фестивалінде өнер көрсетуі тиіс еді, бірақ іс-шараға бірнеше ай қалғанда музыканттар Қазақстанға келуден бас тартты. 2024 жылдың қаңтар айында Таиландта полиция «Би-2» тобын толық құрамымен концерттен кейін ұстады. Таиланд билігі әртістерді Ресейге депортациялауды жоспарлаған.

Ресейдің Украинаға жасаған жойқын шабуылынан кейін «Би-2» Израильге көшті. Лёва Ресей билігінің әрекеттерін Instagram парақшасында бірнеше рет сынға алған. Ресейдің Әділет министрлігі оны шетелдік агенттер тізіміне қосты.

2023 жылы музыканттар Семейдегі концерттен алған гонорарларын Абай облысындағы ірі өрттен зардап шеккендер мен қаза тапқандардың отбасына көмек ретінде аударды.

2025 жылдың ақпан айының басында Украинадағы соғысқа ашық қарсы шығатын тағы бір ресейлік рок-топ — «Наивтің» Қазақстандағы екі концерті өтпей қалды.