Семейде әжей есірткі шеккен немересін полицияға ұстап берді

Семейде зейнеткер полицияға немересі марихуана шегетінін айтып, денсаулығына уайымдайтыны туралы жеткізді.

Бұл туралы Orda.kz хабарлады.

Қарт әйел тікелей Семей полиция басқармасының есірткі қылмысына қарсы іс-қимыл бөліміне жүгінді. Полиция әжейдің қыз баланың денсаулығына алаңдағанын айтты.

«65 жастағы зейнеткер 18 жасар немересінің денсаулығына алаңдап, қыздың пәтерінде сақтаған есірткі заттарын өз еркімен апарып берді» деп хабарлады ШҚО полиция департаментінің баспасөз қызметі.

Сараптама жүргізіліп, оның қорытындысына сәйкес, жалпы салмағы 1,92 грамм марихуана тәркіленді.

Полицейлер қылмыстық кодекстің 296-бабының 2-бөлігі (Есiрткi, психотроптық заттарды, сол тектестерді өткізу мақсатынсыз заңсыз дайындау, қайта өңдеу, иемдену, сақтау, тасымалдау) бойынша сотқа дейінгі тергеуді бастады.

Бұл бап бойынша 160 айлық есептік көрсеткішке дейінгі мөлшерде айыппұл (466 720 теңге), сол мөлшерде түзеу жұмыстары, 160 сағатқа дейінгі мерзімге қоғамдық жұмыстарға тарту немесе 40 тәулікке дейінгі мерзімге қамауға алынады.