Семейде жүргізуші оқушыны қағып, оны белгісіз бағытқа алып кеткен

Семей қалалық ІІБ жаяу жүргіншілер өткелінде 12-13 жастағы қызды қағып, белгісіз бағытта алып кеткен жүргізуші іздестіріліп жатыр.

«22 ақпанда Семей қаласының «102» унитарлық кәсіпорнына «Радуга» сауда үйінің жанындағы реттелмейтін жаяу жүргіншілер өткелінде белгісіз көлік мінген жүргізуші шамамен 12-13 жастағы кәмелетке толмаған қызды қағып кеткені туралы хабарлама келіп түсті. Жүргізуші зардап шеккен қызды белгісіз бағытқа алып кеткен. Семей қалалық ІІБ жеке құрамы баланы қағып кетуіне жол берген жүргізушіні анықтауға жұмылуда» делінген ПД хабарламада.

Бұл ретте, медициналық мекемелер пысықталғаны, тексеру барысында 7-15 жас аралығындағы баланың жазатайым оқиға салдарынан дене жарақатын алу фактісі бойынша «103» арнасына өтініштің анықталмағаны атап өтілді. Сонымен қатар, Семей қаласында балалардың жоғалу фактісі бойынша азаматтардан өтініш тіркелген жоқ.

«Қазіргі уақытта жүргізуші мен баланы анықтау бойынша жедел-іздестіру шаралары жүргізілуде» деп қосты ШҚО ПД.