Семейде шырша безендірген мұғалім: Қала әкімінің орынбасары тергеуге алынды

Семей қаласында шыршаны безендіру кезінде мұғалімнің ауыр жарақат алу оқиғасына қатысты қала әкімінің орынбасары Арайбек Хамзаев күдікті ретінде танылды, деп хабарлайды Orda.kz.

2024 жылдың 21 желтоқсанында Куат Айтқалиев есімді мектеп мұғалімі шырша безендіру жұмыстары кезінде биіктен құлап, ауыр жарақат алған.

Бас прокурор Берік Асыловтың айтуынша, мұғалімнің жарақат алу фактісі бойынша қалалық полиция басқармасы қылмыстық іс қозғап, «қызметтік өкілеттіктерін асыра пайдалану және ауыр салдарларға әкеп соғу» бойынша тергеу жүргізілуде.

2024 жылдың 22 желтоқсанында басталған тергеу барысында, бұл оқиғаға қатысы бар қала әкімінің орынбасары Арайбек Хамзаев, мұғалімдерді өз міндеттеріне кірмейтін жұмыстарға шақырғаны үшін жауапкершілікке тартылып, 27 желтоқсан күні күдікті деп танылды. Қазіргі уақытта  прокуратураның бақылауымен тергеу жүріп жатыр.

Сонымен қатар, полицияға оқыс оқиғаға қатысты арнайы акт жіберіліп, жұмыс берушіге  шара қабылдануда. Сонымен қатар, №19 және №40 мектептердің директорлары да өз мұғалімдерін заңсыз жұмысқа жібергені үшін тәртіптік жауапкершілікке тартылды. Олардың бәріне ескерту берілді. Қалалық білім бөлімінің басшысы қызметінен босатылды.

Абай облысының білім сапасын қамтамасыз ету департаменті де білім беру мекемелерінің басшыларын ҚР Әкімшілік құқық бұзушылық туралы кодексінің 409-бабы, 7-3 тармағы, 1-ші тармақшасына сәйкес әкімшілік жауапкершілікке тартты. Бұл кодекс бойынша педагогтерді кәсіби міндеттеріне қатысы жоқ жұмысқа тартуға болмайды, тек заңмен бекітілген жағдайларда ғана рұқсат етіледі.

Облыстық еңбек инспекциясы комитеті де оқыс оқиғаға арнайы тергеу жүргізіп, жұмыс берушінің толық кінәсін анықтады.