Семейде қылмыс әлемінің серкесі Лёха Семипалатинскийге ескерткіш орнатылды

Абай облысы Семей қаласындағы Знаменка тас жолының бойындағы мұсылман зиратында жұрт арасында «Лёха Семипалатинский» деген атпен танылған Айтқали Маймушевке ескерткіш орнатылды. Ол Қазақстанда «заңды ұрылардың» бірі ретінде танымал болған, деп хабарлайды Orda.kz.

Бұл жайт әлеуметтік желілер мен жергілікті тұрғындар арасында қызу пікірталас туғызды. Көпшілік Маймушевтің есімін қылмыстық ортамен байланыстырып, мұндай тұлғаға ескерткіш қоюды сынға алды. Алайда Абай облысы әкімдігі бұл мәселеге қатысты ресми пікір білдірмеді.

Айтқали Маймушев құқық қорғау органдарының мәліметінше, қылмыстық идеологияны насихаттап, ұйымдасқан қылмыстық топтармен байланыс орнатқан. Ол 2024 жылғы 9 қазанда Карелия Республикасындағы Надвоицы елді мекенінде орналасқан қатаң режимдегі ИК-1 колониясында асылған күйде табылған.

Бұған дейін, 2025 жылғы сәуірде тағы бір танымал қылмыстық тұлға «Голова» деген лақап атпен белгілі 60 жастағы Серік Жаманаев Петропавл қаласында онкологиялық дерттен көз жұмған.