Семейде қазандықтарды жөндеу кезінде қаржы ұрлығы анықталды

Белгілі болғандай, Семейде былтыр қазандық бөлмелері ескі құрылыс материалдарымен жөнделген, бірақ жаңасына бюджеттен  қаржы бөлінген.

Ұрлық фактілері «Теплокоммунэнерго» мемлекеттік кәсіпорнының жылу беру маусымға арналған қазандықтарды тексеру барысында анықталды. @abainewskz жазғандай, ұрлық фактісі 2022 жылы қаладағы қазандықтарды жөндеуге пайдаланылған материалдар жөнінде тіркелген. Осыған орай облыс әкімі Нұрлан Ұранхаев арнайы комиссия құрып, жылу беру маусымы өзінің қатаң бақылауында екенін айтты. 

«Жөндеу жұмыстарының қарқынын арттырып, барлық нысандарды күн сайын тексеріп отыру қажет екенін тағы да қайталаймын. Жауапты облыстық басқармалар, қалалар мен аудандардың бөлімдері жөндеу жұмыстары жүргізіліп жатқан жерде күнде болуы керек. Барлығы дер кезінде  аяқталуы керек. Халық күтіп отыр» , - деді облыс әкімі.

Қазір Абай ауданында жылыту маусымына қызу дайындық жалғасуда. «Ғаббасов» қазандығына ерекше көңіл бөлінуде, ол қазіргі таңда ең қиын шаруа. Барлық жылу нысандарындағы жөндеу жұмыстары 85 пайызға орындалғаны және шенеуніктер 30 қыркүйекке дейін аяқталатыны атап өтілді.