Семей перзентханасында жаңа туған нәрестені күйік шалды

Семей қаласындағы перзентханада жаңа туған нәресте күйік алды. Қазіргі уақытта баланың жағдайы ауыр, деп хабарлайды Orda.kz.

Алғашында дәрігерлер бала терісінің зақымдануын жылыту кілемшесінің қатты қызып кетуімен байланыстырды. Алайда кейіннен олар бұл белгілердің генетикалық ауруға қатысты болуы мүмкін екенін мәлімдеді.

KTK арнасының мәліметінше, нәресте 2 наурызда дүниеге келген және отбасының төртінші баласы. Тексеру барысында миға қан құйылғаны анықталып, ота жасалған. Дәрігерлер бесінші күні баланың денесінде күйік жарақаты бар екенін анасына хабарлаған.

«Реанимация бөлімінің меңгерушісі келіп, қолында көпіршік бар екенін, күйік шалғанын айтты. Мен сұрадым: «Қалай күйік шалды?» деп.  Олар кілемшеде температура реттегіші болғанын түсіндірді. Қарасам, иығынан шынтағына дейін қара күйік, көпіршіктер бар екен», – дейді анасы Камал Оразғалиева.

Мамандар баланың генетикалық мутациясы болуы мүмкін екенін жоққа шығармайды, алайда нақты диагноз әлі қойылған жоқ.

«Баланың жағдайы ауыр деп бағаланып отыр. Бүгін біз бұл оқиғаға қатысты республикалық деңгейде Ана мен бала орталығымен жиналыс өткіздік. Әзірге нақты диагноз қойылған жоқ. Бала санитарлық авиациямен бүгін немесе ертең Астанаға ауыстырылады. Біз республикалық дәрігерлермен кеңестік. Олар да бұл жарақаттың күйікке ұқсамайтынын айтты. Бұл туа біткен немесе генетикалық өзгерістер болуы мүмкін», – деді Абай облысы денсаулық сақтау басқармасы басшысының орынбасары Әсем Орынбаева.

Қазіргі уақытта перзентханада болған оқиғаның мән-жайын құқық қорғау органдары анықтап жатыр. Сәбидің  ата-анасы полицияға шағымданған.