«Семей орманындағы» өрт: қорық басшылығына үкім шығарылды

Абай ауданында «Семей орманы» табиғи резерватында болған ірі орман өртіне қатысты сот үкімі шықты.

Бородулиха аудандық сотында «Семей орманы» мемлекеттік табиғи резерватының қызметкерлеріне өрт қауіпсіздігі талаптарын бұзғаны үшін (ҚК 292-бабы 3-бөлігі) қатысты қылмыстық іс қаралды.

Сот анықтағандай, орман өрті кезінде «Семей орманы» қорығы мен Жаңашүлбі бөлімшесінде басшылық қызмет атқарған В. және К. өрт сөндіруді ұйымдастыру бойынша өз міндеттерін орындамаған, жағдайды дұрыс бағаламаған және 14 адамның өліміне әкеп соқтырған өртті сөндіру кезіндегі қауіпсіздік ережелері талаптарының сақталуын қамтамасыз етпеген.

«Сот екі сотталушының жас балаларының болуы және ауырлататын мән-жайлардың жоқтығы түріндегі жауаптылықты жеңілдететін мән-жайларды ескере отырып, сот В. мен К.-ны кінәлі деп танып, әрқайсысын жеті жылдан бас бостандығынан айырды» деп хабарлады Абай облыстық соты.

Үкім әлі заңды күшіне енген жоқ.

«Семей орманы» қорығында өткен жылдың маусым айында ірі өрт шыққан болатын. Онда  қызмет бабында 14 орманшы мен тағы бір адам, Далон орман шаруашылығының тракторшысы Сергей Архипов  қаза тапқан болатын.