«Семей орманы» қорығының басшылары сотталды

2023 жылғы 29 мамырда Абай облысының қылмыстық істер жөніндегі мамандандырылған ауданаралық сотында «Семей орманы» мемлекеттік орман табиғи резерваты» республикалық мемлекеттік мекемесі басшылығына және басқа да тұлғаларға қатысты үкім жарияланды.

Бұл туралы Orda.kz Сыбайлас жемқорлыққа қарсы қызметке сілтеме жасап хабарлайды.

«Мемлекеттік мекеменің үш басшысы ұйымдасқан қылмыстық топ құру және оған қатысу және кәсіпкерлерден жүйелі түрде 700 мыңнан 13 миллион теңгеге дейін пара алғаны үшін кінәлі деп танылды. Олар қорық аумағында санитарлық тазалау және орман кесу жұмыстарын жүргізуге рұқсат бергені, мемлекеттік сатып алу келісім-шарттарына кедергісіз қол қойғаны үшін, сондай-ақ жалпы қамқорлық жасағаны үшін лауазымды тұлғаларға заңсыз сыйақы аударған» делінген Антикор хабарламасында.

Резервтің үш басшысы да 10 жылға сотталды, бес адам пара бергені үшін кінәлі деп танылып, бір жарым жылдан үш жарым жылға дейін бас бостандығынан айырылды.

Барлық сотталғандар мемлекеттік қызметте, жергілікті өзін-өзі басқару органдарында, қаржылық ұйымдарда және квазимемлекеттік секторда лауазымдарды атқару құқығынан өмір бойына айырылады.