«Семей орманы» орманын отап жатқандар ұсталды  

Абай облысындағы «Семей орманы» табиғи резерваты аумағынан ағаштарды заңсыз алып шығуға тырысқан ұрылар ұсталды, деп хабарлайды Orda.kz.  

Экология министрлігінің орман шаруашылығы комитетінің мәліметіне қарасақ, «Семей орманы» резерватының мемлекеттік инспекторлары аймақтық инспекция қызметкерлерімен бірге резерват аумағында рейд жүргізген. 19 қыркүйекте бір орман шаруашылығынан әкетуге дайындалған ағаштар табылды.  

«Семей филиалының Талицк орман шаруашылығындағы өртенген орманды әзірлеу кезінде белгіленбеген ағаштардың кесілгені белгілі болды. Кінәлі тұлға анықталды. Әкімшілік құқық бұзушылық туралы кодекстің 381-1 бабының 3-бөлігі бойынша әкімшілік іс қозғалды»,  деп хабарлады комитет. 

Жақында ғана «Ертіс орманы» табиғи резерваты аумағында 2029 жылға дейін ағаш кесуге ресми түрде тыйым салынған болатын.  

Бұл «Семей орманына» қатысты алғашқы ірі жанжал емес. Шілде айында резерват филиалы директорларының бірі ағаш ұрлығына байланысты қамауға алынып, уақытша ұстау изоляторына жіберілген болатын. Осы іс бойынша құзырлы орган қызметкерлері жалпы 20-дан астам күдікті тұлғаларды тергеп жатыр.