Секс-туризм Қазақстанның имиджіне нұқсан келтіреді: Депутаттар заңсыз бизнесті тоқтатуды талап етті

Қазақстанды «секс-туризм» елі ретінде таныстырып, халықаралық аренада беделімізге қауіп төнуі жайлы Екатерина Смолякова Олжас Бектеновке сауал жолдады, деп хабарлайды Orda.kz.

Бұл туралы Мәжіліс депутаты, Respublica партиясының өкілі Екатерина Смолякова премьер-министр Олжас Бектеновке жолдаған депутаттық сауалында мәлімдеді.

Депутаттың айтуынша, бір жыл бойы елімізде көші-қон заңнамасын 106 мыңнан астам шетелдік бұзған. Ал шетелдік «экскурсоводтардың» қадағалаусыз келе беруі үнемі мәселе туғызады.

«Бізге Қырғызстаннан, Өзбекстаннан, Ресейден, Үндістаннан, Пәкістаннан және Қытайдан туроператорлар мен гидтер жаппай келіп жатыр. Олар туристерді өз автобустарымен тасымалдап, экскурсиялар өткізіп, қазақстандық нарықтан клиенттерді тартып алып жатыр. Ал біздің туроператорларға сол елдерге жолаушылармен бірге кіруге тыйым салынған. Мұндай жағдайда қалай әділ, тең құқықтар туралы сөз қозғауға болады?» — деп сұрады депутат Смолякова.

Оның айтуынша, заңсыз жұмыс істейтін гидтер салық төлемейді. Мемлекет алдында есеп бермейді және көбіне Қазақстанды туристердің алдында жағымсыз қырынан көрсетеді. Кейбір экскурсияны рұқсатсыз жұмыс істейтін шетелдік студенттер жүргізеді. Олар Қазақстанның тарихы мен мәдениетін білмей, бұрмаланған ақпарат таратады. Бұл елдің беделіне нұқсан келтіреді.

«Үндістан мен Пәкістаннан келген студенттер жаппай гид болып істеп жүр. Осыдан Қазақстанның “секс-туризм елі” ретінде имиджі қалыптасады. Сауатсыз шетелдік гидтер жемқорлық, қылмыс пен жоғары бағалар туралы жалған ақпарат таратып жүр», — деді депутат.

Смолякова туристерді тіркеу мәселесіне де жеке тоқталды. Оның айтуынша, 15 миллион шетелдіктің тек 6 миллионы ғана eQonaq жүйесіне тіркелген, қалғаны «бетегеден биік, жусаннан аласа болып» жүр. Бұл тек бюджетке түсетін қаржының жоғалуын ғана емес, сонымен қатар қауіпсіздікке төнетін қатерді де көрсетеді. Депутат сонымен қатар танымал туристік орындардағы инфрақұрылымның әлсіздігін атап өтті.

«Ең көп турист келетін Алматы мен Алматы облысында қадағалау деген мүлде жоқ. Дәретханалар, қоқыс жәшіктері, демалыс аймақтары мен интернет жоқ. Қонақүйлердің жұлдызды жүйесі мен гидтердің міндетті сертификаттауы да қарастырылмаған. Туризм — бұл елдің бет-бейнесі әрі экономикалық кіріс көзі», — деді Смолякова.

Депутат туристік аймақтарды инвесторлардың басқаруына беруді, биометрия мен Face ID енгізуді, туристерге арналған валюталық шектеулерді қайта қарауды және қоғамдық тамақтану орындарындағы санитарлық бақылауды күшейтуді ұсынды. Ол дұрыс тәсіл қолданылса, туризмнің ЖІӨ-дегі үлесін 3-4 пайызға дейін арттыруға болатынына сенімді.