Щучинск-Астана тас жолында 40 көлік соқтығысты

Ақмола облысында 40-тан астам көлік соқтығысып, үлкен апат болды. Бұл туралы өңірдің полиция департаментінің баспасөз қызметі мәлімдеді, деп жазады Orda.kz.

Оқиға туралы ақпаратты редакцияға оқырмандар жолдады. Куәгерлер мен жол апатына қатысушылар оқиға орнынан видео түсіріп, әлеуметтік желілерде жариялады. Видеода күре жолдағы қарлы боран айқын көрінеді.

«13:30 шамасында, Ақмола облысы Біржан сал ауданына қарасты Қоғам және Қаратал ауылдары аралығында ауа райының нашарлауына байланысты (қарлы боран, көру мүмкіндігі шектеулі) алдын ала мәліметтер бойынш 40 автокөлік соқтығысты. Жапа шеккендер мен қаза тапқандар туралы ақпарат жоқ»,  деп хабарлады департамент өкілдері.

Оқиға орнында полиция және төтенше жағдайлар қызметінің мамандары жұмыс істеп жатыр. Автокөліктерді эвакуациялау және жол қозғалысының қауіпсіздігін қамтамасыз ету жұмыстары жүргізілуде.

Айта кетейік, осыған дейін төтенше жағдайлар қызметі аймақта ауа райының нашарлауы мүмкін екендігі туралы ескерту жасаған болатын. Сол себепті жүргізушілерге әсіресе қала сыртындағы трассаларда жол жүрмеуге кеңес берілген.

«Жүргізушілерді ауа райын ескере отырып, жолда аса сақ болуға және жағдай жақсарғанша бұл бағытқа сапарға шықпауға шақырамыз»,  деп мәлімдеді департамент.