СБУ Украина келіссөздер тобының мүшесі Денис Киреевтің көзін жойды

Гомельдегі бірінші келіссөздер отырысында Украинадан келген Денис Киреевті Украинаның Қауіпсіздік қызметі ұстаған сәтте өлтірді деген ақпарат тарады.

Бұл туралы украиналық «Оbozrevatel» сайты хабарлайды.

Бұған дейін Киреев мемлекетке опасыздық жасады деген күдікке ие болған. Сонымен қатар, халық қалаулысы Александр Дубинский тиісті ақпаратты таратты.

«Киреев – Клюевтердің адамы» деп жазды саясаткер Telegram Dubinsky.pro арнасында.

Бір қызығы, президент аппараты Киреевті келіссөздерге қатысушы ретінде көрсетпеген. Оның аты-жөні баспасөз қызметі жариялаған тізімде жоқ болды. Бірақ фото мен видеода оны Киев өкілдерінің қасындағы үстелде көруге болады.

Киреев – банк саласының сарапшысы. Ол Осчадбанк басқарма төрағасының бұрынғы бірінші орынбасары (2010-2014) және Укрексимбанк бақылау кеңесінің мүшесі (2006-2012).

Еске салсақ, Ресей президенті Владимир Путин Донбас республикалары басшыларының үндеуіне жауап ретінде арнайы әскери операция жүргізу туралы шешім қабылдап, Украинаға қарсы соғыс жариялады. Алайда Ресей басшысы Мәскеудің жоспарында Украина аумақтарын басып алу жоқ екенін айтқан болатын.

2 наурыз күні таңертеңгі жағдай бойынша Ресей әскері 5840 адамнан айырылды. Сондай-ақ 60-тан астам ұшақ пен тікұшақ, 862 бронетранспортер, 85 артиллериялық жүйе және басқа да көптеген техника жойылды. 28 ақпандағы жағдай бойынша 352 бейбіт тұрғын, оның ішінде 16 бала қаза тауып, 2040 адам жарақат алды.

Украина президенті Владимир Зеленский Ресей әскерінің шабуылдың алғашқы сағаттарынан бастап азаматтық инфрақұрылымға соққы беріп жатқанын айтты. Президенттің айтуынша, Ресей басқыншы әскерлерінің Украинадағы әрекеттерінде геноцид белгілері бар.

27 ақпанда Украина «басқыншылықты ақтау үшін геноцид ұғымын бұрмалағаны үшін Ресейді жауапқа тартуды» талап етіп, Халықаралық сотқа Ресейге қарсы шағым түсірді. Ресейдің Украинаға басып кіруіне қатысты тергеуді Халықаралық қылмыстық соттың прокуроры Кәрім Ханның өзі бастады.