Саяси партиялар өкілдерінің пікірсайысы өтті

Кеше кешкісін Қазақстан Республикасы Парламенті Мәжілісінің сайлауына қатысатын жеті саяси партия өкілдері арасында пікірталас болды.

Пікірсайысты КТК телеарнасы тікелей эфирде көрсетті.

Пікірсайысқа «Аманат» партиясының мүшесі Айдос Сарым, «Ақ жол» ҚДП Ұлттық кеңесінің мүшесі Дания Еспаева, «Ауыл» партиясы төрағасының орынбасары Жигули Дайрабаев, Қазақстан халықтық партиясының төрағасы Ермұхамет Ертісбаев, «Байтақ» партиясы саяси кеңесінің мүшесі Айнұр Сәбитова, «Республика» партиясының тең төрайымы Динара Шүкіжанова, Жалпыұлттық социал-демократиялық партиясының төрағасы Асхат Рахымжанов қатысты.

Олар бір-біріне сұрақ қойып, өз партиялары атынан халыққа үндеу тастап, сайлауға шақырды.

Пікірталас соңынан баға берген сарапшылар саяси шоудың элементтері болғанымен, бұрынғыға қарағанда партия мүшелерінің сөйлеу мәнері мен бағдарламаларында оң бастама бар деп атап өтті.

Бұған дейін Qazaqstan ұлттық телеарнасының эфирінде жеті саяси партия өкілдерінің пікірсайысы өткен болатын.

Еске салайық, 19 наурызда елімізде Қазақстан Республикасы Мәжілісі мен мәслихаттары депутаттарының кезектен тыс сайлауы өтеді.