Сауда министрлігі Бақыт Сұлтановтың ұшуларына кеткен миллиондарды түсіндірді

Министрлік Сұлтановтың іссапарларының көбін эконом-класспен ұшатынына сендірді. Шенеунік бизнес-класқа арзанырақ билеттер болмағанда, әрі шұғыл жағдайда ғана отырады.

Ақпан айындағы  Алматы мен Алматы облысына іссапарға келетін болсақ, министрлік оның тұтас делегация екенін атап өтті.

 «Осы нақты жағдайға келсек, мәселелерді сол жерде шешу үшін бірқатар мүдделі мемлекеттік орган өкілдерінен тұратын делегацияның баруы қажет болды. Осыған байланысты арнайы борт пайдаланылды («Бүркіт» мемлекеттік әуе компаниясы» ШЖҚ РМК-ның нақты рейсі). Ағымдағы жылдың ақпан айында Алматыға жұмыс сапары Қырғыз Республикасының үкіметімен халықаралық келіссөздер, сондай-ақ Қырғыз Республикасы мен Ресей Федерациясы делегацияларымен жүргізілген үшжақты келіссөздерге байланысты болды»  делінген хабарламада.

Сапар барысында шенеуніктер Қазақстан-Қытай шекарасындағы «Нұр жолы» өткізу бекеттерінде, «Қорғас-Шығыс қақпасы» еркін экономикалық аймағында және «Қорғас» ШЫХО-да болды.

 «Шұғыл мәселелерді шешуге екі күн ғана берілген. Осыған орай, тиімділік үшін осындай жағдайларға арналған арнайы ұшақ пайдаланылды. Жалпы, жыл басынан бері Бақыт Сұлтанов 15-ке жуық іссапарға барған. Олардың басым бөлігі шетелдік, соның ішінде мемлекет басшысының сапары кезінде» деп толықтырды Сауда министрлігі.

Әлеуметтік желілерде ақпан айында Бақыт Сұлтановтың Алматыға екі күндік іссапарына 9,6 миллион теңге жұмсалғаны туралы ақпарат жарияланған соң, халық арасындағы  туындаған сұрақтарға министрлік өз жауабын берді.