Сауд Арабиясының «Ұйқыдағы ханзадасы» 20 жыл комада жатып қайтыс болды

Сауд Арабиясының ханзадасы Аль-Валид бин Халид Әл Сауд ауыр жол апатынан кейін 20 жылдан астам уақыт комада жатып, 36 жасында қайтыс болды, деп хабарлайды Orda.kz.

Ол 20  жыл бойы Эр-Рияд қаласындағы ауруханада өмірді қолдау аппараттына қосулы жатқан. Дәрігерлер ханзада отбасына өмірін қолдауды тоқтатуға кеңес берген, өйткені айығып кетуге ешқандай мүмкіндік болмаған, алайда оның әкесі, ханзада Халед бин Талал, аппаратты өшіруден бас тартып, ұлының сауығып кететінінен үмітін үзбеген.

Ханзаданың қайтыс болғаны туралы әкесі әлеуметтік желіде хабарлады:

«Алланың жазмышы мен тағдырына сенген жүрекпен, терең қайғы мен мұң үстінде біз сүйікті ұлымыз — ханзада Аль-Валид бин Халид бин Талал бин Абдель Азиз Әл Саудты жоқтап отырмыз. Ол бүгін дүниеден озды. Алла рақымына алсын» деп жазды ол X (бұрынғы Twitter) желісінде. 

Трагедия 2005 жылы, ханзада небәрі 15 жаста болған кезде болған. Ол сол уақытта әскери колледжде оқып жүрген және жол апатынан ауыр бас-ми жарақатын алған.