Сауд Арабиясында қазақстандық пауэрлифтингтен Азия жүлдегері ұсталды

Сауд Арабиясының Медина қаласында Азия чемпионы және әлем чемпионатының жүлдегері 19 жастағы қазақстандық пауэрлифтинг шебері Сергей Веселов ұсталды, деп хабарлайды Orda.kz.

Әкесі Евгений Веселовтың айтуынша, Сергей 19 маусымда Астанадан Ыстамбұлға демалысқа кеткен. Алғашқы күндері жақындарымен байланысып тұрған, алайда бір аптадан соң хабарсыз қалған.

«Қазір оның тірі екенін білеміз. Мединада тергеу изоляторында отыр. Алайда нақты қай бөлімде екені де, не үшін ұсталғаны да әзірге айтылған жоқ. Консул «уақыт керек» деп отыр», — деді спортшының әкесі.

Қазақстан сыртқы істер министрлігі де бұл ақпаратты растады.

«Азаматымыз Сауд Арабиясы құқық қорғау органдары тарапынан ұсталған. Қазіргі таңда Мединада. Әзірге ресми айып тағылған жоқ. Жағдайды анықтап жатырмыз», — деп мәлімдеді министрліктің баспасөз қызметі.

Сергейдің отбасы қазір адвокат пен аудармашы жалдауға мүмкіндік іздеп, қазақстандықтардан көмек сұрайды.

Сергей Веселов — Шығыс Қазақстан облысының бірнеше дүркін чемпионы, Азия чемпионы және әлем чемпионатының жүлдегері.