«Сау жері жоқ»: Түркістан облысының тұрғыны әйелін ұрып өлтірді

Жетісайда күйеуінің аяусыз соққысынан кейін төрт баланың анасы қайтыс болды. Жантүршігерлік оқиғаны Facebook желісінде журналист Гүлмира Әбіқай айтып берді.

Оның айтуынша, марқұмның жасы небәрі 30-да. Артында төрт баласы жетім қалған, олардың ең кішісі алты айлық.

Есірткіге еліккен ер адам әйеліне қол ала жүгіріп, оны өлтіргенше соққыға жыққан.

«Әйелдің сау жері қалмаған. Сүйектері сынып, ішкі ағзалары зақымданған» деп жазды пост авторы.

Әйел шұғыл түрде ауруханаға жатқызылды, ол бір аптаға жуық комада жатты. Бірақ кейін есін жимастан қайтыс болды.

Осы факті бойынша полиция тергеу амалдарын бастады.