Сәтбаевтағы қара қар: Ұлытау әкімдігі бұған не дейді?

Ұлытау облысы Сәтбаев қаласында ауаның ластығынан тіпті қардың өз қарайып кетті, деп хабарлайды Orda.kz.

Қала әкімдігінің түсініктемесі бойынша, Сәтбаев қаласындағы «Молодежный» қазандығындағы арзан көмірдің кесірінен қала осындай күйге түсті. Сондай-ақ 1962 жылдан бері қолданылып келе жатқан жабдықтан да ақау шыққан. 

«Газ тазарту жүйелері толығымен ескірген және қазіргі экологиялық стандарттарға сәйкес келмейді, бұл айтарлықтай қаржыны қажет етеді» деп жазылған хабарламада.

Билік бұл жағдайдың алдын алып, экологияны жақсарту мақсатында жаңа технологиялар әкеліп жатқанын айтты.

«Жылу энергиясы кәсіпорны экологиялық көрсеткіштерді жақсартуға және кешенді экологиялық рұқсат алуға бағытталған ең үздік қолжетімді технологияларды енгізу бойынша белсенді жұмыс істеп жатыр», деп мәлімдеді корпорация мен облыс әкімдігі. 

Сондай-ақ, әкімдік қаланы газдандыру бойынша жоба әзірленіп жатқанын және оның бөлек сектордағы барлық үйлерді қамтитынын мәлімдеді.