«Сарыөзекте сарбазға оқ тиді»: Қазақстан қарулы күштері жауапкершіліктен неге қашады?

Кеше Сарыөзек гарнизонындағы 740 әскери бөлімінің 19 жастағы сарбазы Темірбек Мыңжасаровқа оқ тиді. Әскери бөлім басшылығы оны ауруханаға жатқызудың орнына бір тәулік бойы Сарыөзектегі жалдамалы пәтерде ұстады, деп хабарлайды Orda.kz тілшісі.

Егер Сарыөзек гарнизонының әскери-тергеу бөлімінің жедел қызметкерлері жедел әрекет етіп, іздестіру жұмыстарын бастамағанда бұл жағдай туралы бәлкім, ешкім білмес еді.

«Оқиға Сарыөзек станциясының теміржол перронында болды. Бізді Отарға жіберуге дайындап жатқан еді. Онда әскери тактикалық жаттығулар өтуі керек болатын. Әскери техниканы тиеу жұмыстары жүріп жатқан. Менің қызметтесім пойызға отырар алдында автоматты босатып, оқ тұратын жерін шешіп жатқан кезде кездейсоқ мылтық атылып кетті. Алғашында жарақатты байқамадым, бірақ камуфляж жеңі қанға малынғанда, жараланғанымды түсіндім. Жігіттер бірден алғашқы медициналық көмек көрсетті. Қолымды шынтақтан жоғары тартып байлап, таңғышпен орап тастады», — дейді Мыңжасаров. 

ҚР Қарулы күштерінің Құрлық әскерлері баспасөз қызметі Темірбек Мыңжасаров қаруды қолдану ережесін бұзып, өзі жинаған қарудан оқ атып, оң қолынан жарақат алғаны туралы ақпарат жариялады. Қазір Талдықорған облыстық ауруханасына жеткізіліп, оған қажетті медициналық көмек көрсетілген. Оның жағдайы бір қалыпты.

Әскери ведомство өкілдері мұндай ақпаратты неге сүйеніп таратқаны түсініксіз. Темірбек Мыңжасаровтың айтуынша, ол оңқай және қаруды әрдайым тек оң қолында ұстайды.

«Мен өзімді жараламақ болсам сол қолымды жаралайтын едім. Бұл мүмкін емес, өйткені АК-74 автоматының ұзындығы жарты метрге жуық. Автоматты сол қолыммен ұстап, оң қолымды қалай атып жаралай алар едім?» — деді әскери қызметкер сұрақ қойып.

Осыған байланысты біз Қазақстан Республикасы Қорғаныс министрлігінен қарамағындағы мекеменің мұндай мәлімдемелеріне түсініктеме беруін сұраймыз.

Сонымен қатар, қаруды дұрыс пайдаланбау салдарынан қауіпсіздік шараларының бұзылу фактісі бойынша оқиғаның себептері мен мән-жайларын анықтау жұмыстары жүргізіліп жатыр.

Бұдан бөлек, тиісті медициналық көмек көрсетілмеу фактісі бойынша да тергеу басталды.