Сарыөзек гарнизонының майоры — Асанов есірткімен ұсталды

Сарыөзек әскери гарнизоны дивизионының командирі, майор Самат Асанов үлкен жанжалға ілікті. 10 қарашада Асанов Екатеринбург-Алматы трассасының бойында Geely Coolray көлігін жүргізіп келе жатып, жол ережесін бұзғаны  - нөмірсіз жүргені үшін ұсталған, деп хабарлайды Orda.kz.

Оның көлігін Приозерскіге, Қарағанды облысындағы айып тұрағына жеткізу барысында полиция 12 келі болатын ақ ұнтақ  зат салынған 18 вакум қабын тапты. Қазақстан Республикасы Қылмыстық кодексінің 296-бабының 3-бөлігі бойынша – есірткі және психотроптық заттарды заңсыз айналымға шығару ісі – бойынша қылмыстық іс қозғалды.

Orda.kz редакциясы Қарағанды облысының полиция департаментінің баспасөз қызметінен ресми түсініктеме алу үшін сауал жіберді. 

«10 қараша күні «Балқаш-Сарышаған» автожолында патрульдік полиция батальоны патрульдеу жұмысы барысында 31 жастағы азамат басқарып келе жатқан «Geely Coolray» автокөлігі тоқтатылды. Тоқтатуға себеп – көлік құралының мемлекеттік тіркеу нөмірінің болмауы түріндегі жол қозғалысы ережесін бұзу. Автокөлікті тексеру кезінде жүк салғыштан жалпы салмағы шамамен 12 келі болатын ақ түсті ұнтақ  зат салынған 18 пакет табылды. Оқиға орнына жедел-тергеу тобы шақырылып, тыйым салынған заттың бар екені расталды. Бұл дерек бойынша қылмыстық іс қозғалды. Көлік жүргізушісі ұсталып, уақытша ұстау изоляторына қамалды. Полиция азаматтардың қауіпсіздігін қамтамасыз ету және есірткі таралуының алдын алу мақсатында есірткі қылмыстарына қарсы күрес жұмысын күшейте береді»,  деп мәлімдеді Қарағанды облысы Полиция департаментінің баспасөз қызметі.