Сарыағаштағы бес жасар қыздың өлімі: ауыл тұрғындары наразылыққа шықты

Бүгін Түркістан облысы Сарыағаш ауданы Жібек жолы ауылында бес жасар қыздың өліміне қатысты әділ тергеуді талап еткен бір топ адам наразылық шеруін ұйымдастырды.

Азаттық мәліметінше, бір топ әйел «Педофилдерге өлім!», «Әділ сот болсын!» деген жазуы бар плакат ұстап, қазақ-өзбек шекара бекетіне апаратын күре жолды жауып тастаған. Оқиға орнына тәртіп сақшылары мен арнайы жасақ келді.

Наразы жұрт қыздың өліміне байланысты тағы бір күдікті шақырылып, кейін босатылғанын айтады. Олар күдіктіні сот-медициналық сараптаманың қорытындысынсыз жібермеу туралы талап қойып отыр.

Айта кетейік, қайғылы оқиға Түркістан облысы Сарыағаш ауданында болды. Жоғалып кеткен 5 жасар қыздың мәйіті көршісінің үйінен табылған. Кәмелет жасына толмаған қызды зорлап, кейін оны өлтірген күдікті бұған дейін де сотты болған.

Жоғары сот бұл іске қатысты тексеріс жүргізіп, нәтижесінде Түркістан облысы Сарыағаш аудандық сотының төрағасы қызметінен босатылды.

Мемлекет басшысы Қасым-Жомарт Тоқаев та Түркістан облысындағы оқиғаның мән-жайын мұқият тексеруді тапсырды.