«Сарбаздар өліп жатыр ма? Не айтып тұрсыз!»: қорғаныс министрі неге таңқалды?

Қорғаныс министрі Дәурен Қосанов сенат дәлізінде әскердегі жағдайға және қаза тапқан сарбаздардың аналарының наразылығына қатысты сұрақтарға жауап берді, деп хабарлайды Orda.kz.

Журналистер министрден: «соңғы уақытта әскери бөлімдерде сарбаздардың жиі қаза тауып жатқаны, ай сайын бірнеше өлім тіркелетіні айтылып жүр. Бұл жағдайға байланысты министрлік қандай шаралар қабылдайды?» деп сұрады. Бұл сұрақ Қосановты таңғалдырғандай болды.

«Не дейсіз? Сарбаздар? Не айтып тұрсыз?», — деп сенбегендей таңданысын білдірді қорғаныс министрі.

Оның айтуынша, қазір әскерде өлім-жітім «жиі болып жатқан жоқ». Ал наразылыққа шыққан аналар айтып жүрген оқиғалар алдыңғы жылдарға тиесілі.

«Бұл аналар айтып отырған оқиғалар 2020–2023 жылдары болған. Митингіде көтерілген мәселелер тергеу органдарының құзырында. Тергеуді Ішкі істер министрлігі жүргізеді, ал Бас әскери прокуратура бақылап отыр. Бұл мәселелер бізге тікелей қатысты емес» деп санайды Даурен Қосанов.

Журналистер аналар айтып жүрген әлімжеттік, зорлық-зомбылық, зорлау және кісі өлтіру жағдайлары жайлы сұрағанда, министр нақты деректерді ұсынуды талап етті.

Үміті үзілген аналардың наразылығы туралы жеткізгенімізде министр әрдайым диалогқа дайын екенін айтты.

«Иә, біз оларға құлақ асуға дайынбыз. Командирлермен, психологтармен жұмыс істейміз. Бөлімдерге камера орнатып жатырмыз, пресс-турлар ұйымдастырамыз. Журналистерді айына кем дегенде бір рет шақырамыз», — деді Қосанов.