Сарбаздар өліміне әскер ғана кінәлі емес – Қорғаныс министрі

Қорғаныс министрі Руслан Жақсылықов әскердегі сарбаздар өліміне қатысты пікір білдірді. Министрдің айтуынша, сарбаздардың өліміне тек әскер ғана кінәлі емес.

– Бірінші кезекте себебін анықтау керек. Жастар неге өз-өзіне қол жұмсайды? Бұған тек әскер ғана кінәлі емес. Әскерге келгендердің өміріне командирлер жауапты. Бірақ ол әскерге өз мәселелерімен келген. Біздің міндетіміз сарбаздың әскери өмірге бейімделуіне көмектесу,- деді министр журналистердің сұрақтарына жауап бере отырып.

Жақын күндері Маңғыстау облысының Бейнеу ауданындағы шекара қызметінде әскери борышын өтеп жүріп, өзіне қол жұмсаған сарбаздың анасы президентке үндеу жолдады. Президент Қасым-Жомарт Тоқаев Қазақстан армиясындағы әскери қызметшілер арасында өлім-жітімнің жиілегеніне ерекше назар аударды.

Мемлекет басшысы осындай келеңсіздіктердің себебін тергеп-тексеру, әскери қызметшілер арасындағы заңсыздықтарды жою және келешекте әскердегі мұндай теріс іс-әрекеттерді болдырмау үшін өзінің көмекшісі – Қауіпсіздік Кеңесінің хатшысы Ғизат Нұрдәулетовтің басшылығымен арнайы комиссия құруды тапсырды.