Сарапшылар Қазақстаның энергетикалық дағдарысын  болжады

Алдағы 5-10 жылда елде энергетикалық дағдарыс орын алуы мүмкін, қазақстандық сарапшылар осыны  айтып, алдын алу шараларына шақыруда.

«Қазақ электр энергетикасы» қауымдастығының төрағасы Талғат Темірханов таяу болашақта еліміз  энергетикалық тапшылыққа тірелуі мүмкін деп болжаған болатын. Оның айтуынша, стансалардың тозуы салдарынан сөзсіз туындайтын энергетикалық дағдарыс орны толмас зардаптарға әкелуі мүмкін.

— Біз биылғы жылыту маусымын, жалпы қысты ауыр апатсыз өттік. Енді мен Петропавл  жағдайын айтып отырған жоқпын. Бірақ тәжірибе көрсеткендей, жылдан жылға шағын жазатайым оқиғалардың саны артып келеді. Бұл біздің әлі де апатты жағдайда  жұмыс істеп жатқанымызды көрсетеді. Тозу өте жоғары. Ал алдағы 5-10 жылда желілердің, жылу желілерінің тозуы мәселелерімен айналыспасақ, апаттар көбейіп, тіпті қалалар үшін, моноқалалар үшін айтарлықтай қиындықтар туындауы мүмкін, - деді Талғат Темірханов.

Оның айтуынша, бүгінде елімізде 60-тан астам электр стансасы болса, оның 90 пайызының тозығы жеткен.

Темірхановтың сөзін Петропавл 2-ЖЭО-да 20 наурызда үш құбырдың бірі құлап, астында 37 жастағы әйелдің мәйіті табылған  апат анық дәлелдейді. Белгілі болғандай, аталған оқиғадан кейін Степногорск ЖЭО-да екі апат орын алғанын да ескерген жөн.