Санкт-Петербургте Қазақстан азаматы 16 жылға бас бостандығынан айырылды

Украина билігіне жұмыс істеді деген айыппен Қазақстан азаматы Артур Мартынов 16 жылға сотталды, деп хабарлайды Orda.kz.

Тергеу мәліметтеріне сәйкес, 28 жастағы Мартынов Украина арнайы қызметінің мүдделі сыбайласы бола отырып, ақшалай сыйақы үшін Санкт-Петербург пен Ленинград облысындағы байланыс нысандары мен энергетикалық инфрақұрылымға қатысты аса ауыр қылмыстар жасауға келіскен.

Мартынов келесі баптар бойынша кінәлі деп танылды:

• РФ ҚК-нің 30-бабы 3-бөлігі, 205-бабы 1-бөлігі (террористік акт жасауға оқталу);
• 205.1-бабы 3-бөлігі (террористік қызметке жәрдемдесу);
• 205.3-бабы (террористік қызметті жүзеге асыру мақсатында оқудан өту);
• 276-бабы (тыңшылық);
• 281-бабы 1-бөлігі (диверсия);
• 281-бабы 2-бөлігі «б» тармағы (айтарлықтай мүліктік зиян келтірген диверсия);
• 281.2-бабы (диверсиялық қызметті жүзеге асыру мақсатында оқудан өту).

Тергеу мәліметінше, сотталушы арнайы оқудан өтіп, жұмыс бабы деген сылтаумен Ресейге келген.

2023 жылғы қыркүйек-қазан айларында ол Санкт-Петербург пен Ленинград облысында байланыс мұнараларын, электр жабдықтарын өртеп, трансформаторды өртеуге әрекет жасаған. Сонымен қатар, Санкт-Петербургтегі мұнай өңдеу кешенінің координаттарын шетелдік барлауға берген.