Санкт-Петерборда суға батып кеткен автобустан адамдарды құтқаруға атсалысқан қазақстандық азамат марапатталды

Ерхан Аханов Санкт-Петербор губернаторының қолынан сыйлық пен қаланың таңбасы бейнеленген естелік сағат алды.

10 мамырда болған апат кезінде жерлесіміз Ерхан Аханов  арнайы қызмет келгенге дейін  Мойка өзенінен автобус жолаушыларын құтқаруға қатысқан. Оқиғаға атсалысқан 15 адам марапатталды.

«Ерлік пен батырлықта ұлт жоқ» деген сөздер бар. Барлығымыз тату болуымыз керек, әрқашан көмек қолын созып, айналып өтпеуіміз керек»,-  деді Ерхан Аханов қала мэрімен кездесуінде.

Қала басшысы Беглов батырларға қала тұрғындары атынан ерліктері үшін алғыс айтып, ата-аналарына берген тәрбиесіне ризашылығын білдірді.

Еске салайық, қазір Санкт-Петерборда тұратын жерлесіміз 26 жастағы Ерхан Аханов суға батып бара жатқан автобустан адамдарды құтқару кезінде жұртқа танылған болатын.