«Самұрық-Қазына» жеткізушілерді меншік иелері туралы ақпаратты жария етуге міндеттейтін болады

Қор бұл шара сатып алудың ашықтығын арттырып, сыбайлас жемқорлық тәуекелдерін азайтады деп есептейді.

«Самұрық-Қазына» ҰӘҚ» АҚ жеткізушілерді түпкілікті иелері туралы ақпаратты ашуға міндеттейді, деп хабарлайды Orda.kz қордың ресми Telegram-каналына сілтеме жасап.

Бұл туралы жұма, 31 наурызда «Қазақстан Республикасында сыбайлас жемқорлыққа қарсы комплаенсті дамыту» форумы барысында белгілі болды.

«Сыбайлас жемқорлыққа қарсы комплаенстің практикалық мәселелері» сессиясының модераторы «Самұрық-Қазына» қорының Комплаенс қызметінің басшысы Дәурен Ақшалов болды.

Оның айтуынша, қор сатып алудың жаңа рәсімінің жобасына сатып алуға қатысатын жеткізушілер үшін түпкілікті бенефициарлық меншік иелерін ашу туралы ұсыныс енгізген. Бұл шара сатып алудың ашықтығын арттырып, сыбайлас жемқорлық тәуекелдерін азайтады.

Еске салайық, Мемлекет басшысының тапсырмасымен «Самұрық-Қазына» ҰӘҚ» АҚ сатып алудың жаңа тәртібін әзірледі. Бірақ адал бәсекелестік пен бизнестің теңдігі қағидаттарын бұзатын ережелер де жоққа шығарылған жоқ. Бұл туралы өткен көктемде сенатор Еділ Мамытбеков мәлім етті.

Сондай-ақ, «Самұрық-Қазына» қорының лауазымдарына үміткер 27 адам полиграфиялық тестілеуден өте алмағаны белгілі болды.