«Самұрық Қазынаның» экс-директоры Марат Әйтенов қамауға алынды

Шымкент экс-әкімінің ағасы Марат Әйтенов әйеліне күш көрсеткені үшін 5 күнге қамауға алынды.

Астана қаласының әкімшілік құқық бұзушылық жөніндегі мамандандырылған ауданаралық сотында құқық бұзушыға қатысты іс қаралды. 

 Марат Әйтенов үйдегі отбасылық жанжал кезінде бұрынғы жұбайының абыройы мен қадір-қасиетін қорлап, оған дөрекілік көрсеткен. Осылайша отбасына құрмет көрсетпей, басқа адамдардың да тыныштығын бұзған.  

Сот отырысы барысында құқық бұзушы өз кінәсін мойындаған жоқ. Бұрынғы жұбайы оның өтініші бойынша балаларын беруден бас тартып, олардың қолдарынан ұстап жібермегенін түсіндірді. Ол балаларды алып кету үшін еденде отырған әйелдің аяғынан сүйреген. Әйтенов әдепсіз сөз айтпағанын және әйелін ұрмағанын айтады.

Дана Әтешова бұрынғы күйеуі оны көшіру кезінде заңсыз келіп, оған шабуыл жасап, денесіне зақым келтіргенін айтты. Жасалған құқық бұзушылықтың мән-жайлары әкімшілік құқық бұзушылық туралы хаттамамен, бейнежазбамен, жәбірленушінің түсіндірмелерімен расталды.  

Жоғарыда келтірілген мән-жайларды, сондай-ақ жеке адамның құқықтарына қол сұғатын іс-әрекеті жасалғанын ескере отырып, құқық бұзушы ӘҚБтК-нің 73-бабының 1-бөлігі бойынша кінәлі деп танылып, Марат Әйтенов 5 тәулікке қамауға алынды.  

 Қаулы заңды күшіне енген жоқ.